政情：大整蠱鄧家彪議辦慘變收件站
近年主打快件速運服務嘅公司大行其道，數目之多幾乎拍得住梗有一間喺附近嘅便利店，但勢估唔到有區議員辦事處「被加入」中轉收發站行列，講緊就係身兼勞工顧問委員會勞方委員嘅離島區議員鄧家彪（阿彪）位於東涌逸東邨嘅議員辦事處，最近八個月以來多次收到不明來歷嘅物品，包括有紅景天膠囊、漫畫及皮革等，有一次寄出嘅地點仲來自日本添！阿彪今次高調自爆「被惡搞」嘅來龍去脈，似乎都係未雨綢繆，避免畀不明來歷嘅物品搞到「中伏」，到時真係水洗都唔清嘞！
近八個月不斷收千奇百怪物品
阿彪出任離島區議員多年，佢位於東涌嘅辦事處亦啟用咗十年，一直相安無事，之不過近八個月就發生咗意想不到嘅事情，就係辦事處開始收到千奇百怪嘅物品，包括紅景天膠囊、漫畫及皮革等，有一次係收到掛號信，另一次嘅信封抬頭，仲寫明收件人係阿彪，就此，佢上星期已到警署備案。
仲未搵到有關交易平台負責人
對於區議員辦事處變中轉收發站，阿彪對此感到匪夷所思，因為佢間辦事處開設多年，冇用作其他用途，又話最壞情況係「中招」違法，佢估計，可能有交易平台借咗佢辦事處作為中轉收發站，佢強調辦事處唔可以，亦唔應該有其他用途，希望搵到有關交易平台嘅負責人，盡快禁絕同類事件再次發生。
除咗阿彪嘅辦事處「中招」，觀塘區議員顏汶羽喺觀塘彩霞邨嘅辦事處亦收過「奇怪」傳單，所指嘅係速遞到辦事處嘅古董拍賣清單，就此，佢打電話畀嗰間古董拍賣行職員了解，先發現自己無端端加入咗佢哋嘅聯絡名單之中，之後當然即時要求剔出聯絡名單，自此就再冇收過類似嘅拍賣清單。
其實立法會議員、區議員辦事處嘅設立，目的係有一個據點為市民排難解紛，佢哋真係要打醒十二分精神，否則畀不法之徒借辦事處地址「另有所圖」，甚至有金錢上損失，就真係後悔莫及嘞！