中環出更：周啟良劉燊濤遊日本唔怕打仗
北韓尋日罕有咁發射導彈飛越日本領空，搞到日本政府要發出緊急避難指示，令緊張形勢升級，鍾意去日本玩嘅香港人都咪話唔驚。卓妮尋日喺一個活動上同香港貿易發展局副總裁周啟良、香港錶廠商會副會長劉燊濤（Gary）講起呢個話題，咁啱兩人下個月都會去日本玩，但佢哋都話唔驚得咁多，唔會因此改變行程喎。
周啟良鍾意去日本食嘢，每年都去兩、三次，至今已去咗幾十次，下個月佢會去北海道自駕遊。雖然朝鮮半島局勢日趨緊張，但佢就認為打仗嘅機會唔大，相信北韓都係擺吓姿態啫，擦槍走火嘅機會好微。
Gary九月尾都會同太太去東京玩，佢一派輕鬆話冇得驚，如果驚就邊度都唔使去喇！講到驚，Gary話太太驚第三胎仲係仔，事關佢哋已經有兩個仔，細仔啱啱過咗百日，但佢哋已想追第三個，目標梗係追個小公主喇！
梁輝文話鐘錶業面臨新挑戰
講番個活動，係為下星期登場嘅全球最大香港鐘表展造勢，鐘表展聯名主席梁輝文（Moses）同梁嘉威、香港鐘錶業總會主席孫大豪同父親孫秉樞、香港錶廠商會名譽會長黎衍橋等業界翹楚都去撐場。
今屆參展商多達八百二十家，創三十六屆以來嘅最高紀錄，多個數據亦顯示鐘錶出口同零售市道已經回暖。不過，Moses話業界面臨新挑戰，因為年初瑞士收緊「瑞士製造」標籤指引，規定鐘錶必須至少有六成以上嘅生產值喺瑞士完成，先可貼上述標籤。佢話鐘表展期間將舉行專場研討會，探討政策帶來嘅衝擊同商機。
卓妮