一不離二，二不離三。興德學校「影子學生」醜聞仲未平息，接連又有兩間學校被揭發有同類問題，大家不禁懷疑，呢啲會唔會只係冰山一角，全港中、小學究竟仲收收埋埋幾多「影子學生」？
今次被指有問題嘅其中一間小學位於元朗，據講該校容許三名幾乎缺席所有考試，以及一個學年缺課一百零八日嘅學生繼續升班，甚至為佢哋保留學位近兩年，有校內人士質疑咁做係為咗做靚收生盤數。事實上，製造「影子學生」招數多多，除咗「無中生有」，仲可以玩「分身術」，屯門某中學被指將多名較高年級生插班到中一，令中一人數足夠開多一班，教育局點人數後已將有關學生調回原有班級。
正如屯門區教育界人士指出，該區中學近年面對學生人口不足嘅巨大壓力，其中又以一六/一七學年情況最為嚴重，全區約有九百多個中一剩餘學額，十多間中學開唔足三班，佔全區學校約三分之一。諗都諗到啦，係生源日漸緊絀之下，學校為避免「縮班」甚至「殺校」，保住一眾老師教席，自然有誘因靠「影子學生」篤數。
上述情況，唔單止係業界公開秘密，教育官僚亦知之甚詳，只不過一直闊佬懶理，卒之搞到問題積重難返。好似興德學校校政管理亂象多多，投訴不斷，點知教育局當耳邊風。前任教育局局長吳得掂就話顧住遊埠(目及)短裙學生妹啫，教育局仲有其他高官o架，好似依家坐正嘅楊潤雄就擔任副局長多年，唔通全部瞌晒眼瞓？
冇計喇，港產官僚唔到死人冧樓都唔會做嘢，家陣經傳媒踢爆，風頭火勢，教育局惟有急急補鑊，承諾檢討事件同埋現行機制，話將來未必會好似以前咁特定某一日「數人頭」，而改為突擊檢查全校或個別班嘅實際學生數量喎。呢啲咪不打自招囉，事先講好邊日「數人頭」，同警方內鬼通告幾時掃蕩娛樂場所冇咩分別，學校大把時間準備應對檢查嘅障眼法。
教育官僚苟且姑息，固然難辭其咎，學校同教師亦有誘因成為利益共同體甚至攻守同盟，事關學校製造「影子學生」，校長同教師其實係同坐一條船，只要可以向教育局「證明」收生「充足」，大家就可保住飯碗。興德學校如果唔係發生內部矛盾，有人不滿被炒而向當局及教協舉報，可能到依家仲係臭屎密冚吖！
好明顯，「影子學生」亂象，乃係教育官僚同校方嘅「共業」。公帑被騙尚在其次，為人師表親身向下一代示範弄虛作假，偷樑換柱，蒙混過關，誤人子弟嗰度先至大鑊！