政情：八網難逃：許曉暉颱風日同囡囡練字
啱啱過咗嘅星期日高掛八號風球，市民有大半日時間冇得出街，小朋友留喺屋企做乜好呢？一樣可以有親子活動嘅，好似民政事務局前副局長許曉暉就同兩個囡囡練字嘞！
許曉暉前日喺社交網站Facebook上載咗兩張相，又貼文喺颱風日同囡囡練字，話好開心見到兩個囡囡啲字慢慢有進步，仲叫網友睇吓啲筆迹估吓係邊個寫嘅添！呢兩張相係唔同內容嘅，其中一張所寫嘅字係唐朝詩人劉禹錫嘅《竹枝詞》，另一張寫嘅係《論語》，唔知囡囡練字嘅時候，明唔明箇中意思？
自細學字 「好似衣着咁重要」
其實許曉暉都係好字之人，事關佢自細就同老師學字，亦都堅持教囡囡寫字，佢曾經話過字就好似衣着咁重要喎。
眾所周知，許曉暉對文化好有興趣，佢離開咗政府熱廚房之後，大多出席嘅公開活動都係同文化有關，例如早前舉行嘅大型水墨展咁，而佢早前亦相約朋友去咗屯門嘅中山公園，仲喺被評為一級歷史價值嘅紅樓睇睇添！