政情：梁志祥檳城避風 歎黑刺榴槤
一個禮拜就打咗兩次風，立法會議員梁志祥似乎冇受到風暴來襲所影響，事關喺帕卡襲港期間，佢同家人一齊飛咗去馬來西亞吉隆坡嘅檳城歎榴槤，仲同網友們推介當地嘅特產——黑刺榴槤添！
仲食咗好多海鮮
梁志祥早前喺社交網站Facebook上載咗幾張相片，仲好開心咁話馬來西亞景色優美，值得一遊，仲推介網友去到當地「一定要食榴槤」。之不過，今次就唔係食貓山王咁簡單，而係有朋友帶佢到榴槤攤檔，享受檳城嘅特產黑刺。佢話黑刺嘅產量並唔多，味濃而不糊口，所以近年嚟都受唔少鍾意榴槤嘅粉絲追捧喎。
黑刺嘅外形亦都比一般榴槤圓，加上佢嘅榴槤刺亦都黑黑哋，所以先叫做黑刺，佢嘅肉質比較甜，而且肉色偏紅，但產量唔多，所以比一般榴槤矜貴o架，難怪梁志祥要專程飛去馬來西亞食好嘢啦！唔單止食榴槤，睇佢喺Facebook上載嘅相，佢仲食咗好多海鮮添！