政情：監獄收音機停產 邵家臻促懲教處理
立法會審議新界東北發展前期工程撥款時，有示威者衝擊立法會大樓，其後有十三名男女被裁定非法集結罪成，早前被判入獄八至十三個月。立法會議員邵家臻尋日到赤柱東頭懲教所探望被判囚人士後，喺社交網站Facebook上貼文，話收音機係在囚人士嘅恩物，但得悉懲教署指定收音機型號最近停產，令親友無辦法送收音機畀在囚人士，佢將會去信署方要求盡快處理事件，以免剝奪囚友收聽收音機嘅權利。
在囚郭耀昌想多啲人探監
邵家臻探望咗分別被判囚十三個月及八個月嘅郭耀昌同黃根源，佢話郭耀昌係設計人，曾協助社民連同香港眾志做文宣，過往亦有被捕經驗，咁啱佢入獄嗰陣係風暴襲港前夕，監獄裏面熱到要除上衫瞓覺，日間暫時負責洗廁所等雜務，稍後會被分派製作圖書館書籍嘅硬皮封面。郭耀昌亦打算喺出年五月出獄後，立即幫手做區議會選舉，仲話「起步遲晒，要衝番啲時間」。
邵家臻又透露，之前擔心以議員身份探監會令囚友覺得煩擾，但郭耀昌指「愈多人探愈好」，因為在囚時好悶，如果遇上酷熱天氣警告或風暴影響，連一小時嘅放風時間都會被取消，所以探監真係好重要。