政情：補選爭崩頭 峯鴿鬥輸乳鴿

許智峯支持鍾紹瓊出選

新政府最少有兩名區議員辭職走入官場，除咗蕭嘉怡喺周五履新政務司司長政治助理外，自由黨陳浩濂本月中已出任財經事務及庫務局副局長，蕭陳辭去區議員後嘅議席空缺將會補選。

據悉，建制派對重奪蕭嘉怡所屬嘅東華選區唔樂觀，民主派認為有機可乘，因此決定重錘出擊，據報按照慣例，白鴿黨喺前年區議會選舉曾派人出選東華選區，預料喺今次補選有優先權派人爭奪議席，白鴿黨內亦已就此醞釀及討論人選。

據了解，早年曾參選東華選區嘅立法會前議員何俊仁細佬何俊麒無意再次披甲，峯鴿及被統稱為「區羅柴」嘅三名南區乳鴿，即羅健熙、南區區議員柴文瀚及區諾軒，各有心儀人選，其中峯鴿屬意佢老友吳兆康嘅太太鍾紹瓊出戰，「區羅柴」就撐曾經兩度喺區選敗選嘅「八十後」伍凱欣第三度出戰區選。

傳黨內初選伍凱欣勝出

消息指，該黨近日已進行港島支部初選，峯鴿鬥唔過乳鴿，支部決定通過推薦有多年地區工作經驗嘅伍凱欣出選，但一切仍有待中委會作最後確認。峯鴿接受查詢時話，黨內仍然有多個程序要通過，唔方便透露目前情況。

有白鴿黨中人分析，峯鴿即使當選立法會議員，但仍然唔及黨內元老支持嘅「區羅柴」咁有牙力，估計佢喺黨內隨時被邊緣化；另有人亦指伍凱欣喺西環一帶服務多年時間，推薦佢出選係有根有據，唔涉及派別之爭。

話時話，今次只係中西區一個選區嘅補選，白鴿黨中人已經鬥到你死我活，未來關乎立法會多個議席嘅補選陸續有來，睇怕白鴿黨嘅唔同派別之爭將會好戲連場。