中環出更：邀青年入政府諮詢架構 霍啟山倡夜晚開會
政府開口埋口都話重視青年工作，又話要搵大量青年加入政府諮詢架構。尋日卓妮喺一個青年活動上見到廣東青年總會執行主席霍啟山，梗係要問佢政府有冇搵佢哋推薦人才喇，不過佢就冇正面回答，但提到政府正密密聽取意見，其中有人提出年輕人多數要開工，朝早好難抽身開會，如果政府採納呢個意見，將來部分諮詢委員會可能破格喺夜晚開會喎。
霍啟山話政府若果要廣納青年意見，需要設立更多唔同嘅委員會，畀唔同界別嘅年輕人參與。佢哋就進行緊一項香港年輕人及珠三角，特別係粵港澳大灣區年輕人，對大灣區意見及期望嘅民意調查，希望提供多啲數據同資料畀政府，作為制訂青年政策嘅參考。
尋日嘅活動主要係宣布由共和國之旅青年築夢基金主席馬鴻銘發起，並聯同香港八大青年團體共同合辦嘅《粵港澳大灣區青年考察團暨發展戰略意向書簽訂》系列活動。有份參與嘅香港青年聯會主席郭永亮、香港五邑青年總會會長黃達東、港漂圈創始人趙磊同埋香港優才及專才協會主席駱勇等人都有到場。
陳積志一上任撞正兩個颱風
馬鴻銘話希望藉安排一系列考察團到訪內地城市，同當地政府部門或企業結盟，簽訂青年發展戰略意向書，建立一個長遠嘅平台，為港青提供學業、就業、創業同置業嘅錦囊。
民政事務局副局長陳積志都有出席，佢返咗工未夠一星期就遇上兩個颱風襲港，都唔知係好彩定唔好彩。佢笑笑口話自己由公務員轉換跑道加入問責團隊，係做到「無縫交接」。事關佢今個月廿二日返工到夜晚十二點，翌日變身問責官員，雖然當日撞正十號風球高高掛，但佢喺八號風球除下前就返到辦公室嘞！
卓妮