政情：馮檢基革新民協 拍片玩食字
民協喺舊年立法會選舉遇上挫折，為咗重生而致力革新，繼早前深水埗區議員楊彧有新搞作，透過航拍跟進地區問題，民協內從政資歷最深嘅馮檢基（阿基）都為革新諗頭多多，最近聯同深水埗區議員鄒穎恒（Zoe）拍片玩食字，打造「基‧層深度行」，直擊劏房戶嘅廁所同廚房毗鄰嘅悲歌，加上每周最少上一次網台同網民直接對話，阿基為拉近同網民嘅距離，真係瞓身搏盡。
直擊劏房環境
片中阿基同Zoe用一百蚊去街市買餸煮晚餐，最終有肉、有雞、有菜，剩番五蚊買咗五隻雞蛋，阿基喺片尾慨嘆全港有三十萬人住喺劏房，要求政府「抹走」劏房呢個居住環境，令港人有獨立自主永久嘅空間，否則喺庫房咁富裕嘅情況下，真係對唔住港人。
除此以外，民協嘅革新亦由領導層換屆出發，去年底已經由「八十後」嘅黃大仙區議員施德來擔大旗做民協主席，換言之係以新生代接棒當時嘅中生代莫嘉嫻。對於有傳莫嘉嫻辭任主席同阿基有關，有知情人士話兩者無關，前者係為立法會選舉失利負責，阿基亦曾向莫嘉嫻作出挽留；至於莫早前退出民協，據聞阿基感到可惜，但表示尊重。