政情：鄭承隆買7000呎日本旅館 招呼黨友賞櫻
近年唔少香港人都考慮投資海外物業，新思維副主席鄭承隆（Edwin）就自爆啱啱喺日本河津買入一間附有溫泉嘅七千呎豪宅，下月頭就會飛去當地安排裝修，仲話農曆新年時打算招呼一班黨友去佢日本新居賞櫻添！
趁匯價下跌平價買入
Edwin話早前趁日圓匯價下跌，用咗超抵價錢買入一棟位於日本靜岡縣河津嘅七千呎日式小旅館，預計年底就會完成裝修。雖然佢買嘅係一間小旅館，但佢無打算以旅館方式經營，反而希望用嚟招呼好朋友，仲話會將房間由九間改成六間，希望朋友住得舒適。
至於點解選擇當地置業，Edwin話係因為每年東京近郊最早盛開嘅櫻花就喺河津，唔知佢係咪成日去睇櫻花呢？到時又會唔會邊浸溫泉邊賞櫻呢？