政情：緬懷觀塘回憶 柯創盛自爆拍拖史
觀塘重建步伐不斷，連屹立裕民坊三十幾年嘅麥當勞都鬥唔過時代巨輪，將於月底告別觀塘。立法會議員柯創盛（柯仔）尋日就同埋一班地區兄弟去緬懷一番。佢仲自爆同當時嘅女友，即係現時嘅太太拍拖嗰陣，喺呢間快餐店留低唔少回憶添！
去快餐店接女友加晒分
柯仔話，拍拖初期佢對女友管接管送，如果女友遲收工就會去嗰度食消夜，有時留至熄燈收舖先走。有一晚，柯仔因為要開會而無法接女友，開完會即刻致電女友，想知佢安全返到屋企未，偏偏女友無開電話，而女友家人更話佢仲未返到，當時柯仔真係好擔心。
情急之下，佢決定博一博，就係直接去嗰間快餐店搵女友，結果又畀佢估中喎。柯仔突然現身，女友梗係好驚喜，柯仔直言呢件事令佢加晒分，所以嚇餐死都值得喎。難怪佢對呢個地方有咁深感情喇！