開講有話︰吃一塹，長一智。前排牛頭角迷你倉長命大火，揭發工廈違規亂象叢生，多個衙門之後係威係勢上演巡查騷，點知話口未完又發生奪命意外，雖然話可能涉及人為因素，但官老爺點都唔可以掉以輕心！
尋日挨晚六點幾，葵涌一幢工業大廈其中一個單位發生火警，釀成三人死亡嘅慘劇，據講起火單位係一個工作室，亦有租戶指出，起火樓層有單位一劏十七戶出租，除咗貨倉，租戶包括用作Band房、倉庫及辦公室等，日夜都有人出入；而從新聞畫面中可以見到，有疏散群眾抱住寵物狗逃生，可見除咗商用之外，工廈可能住咗唔少人。
姑勿論點講都好，工廈違規改建情況嚴重，係鐵一般事實，改裝成食肆有之、補習社有之，甚至燒烤場都有，五花八門，無奇不有，上述場所人流密集，出起事上嚟分分鐘一鑊熟，絕對唔講得笑。
成日話港產官僚唔死人冧樓唔做嘢，做嘢又做到甩甩漏漏，唔湯唔水，真係冇冤枉o架！好似地政官僚巡查單位違契咁吖，好多時只係朝九晚五出動，摸門釘就當冇事發生收隊了事，咁搞法，有乜法子唔出事吖！
工廈擅改用途固然危機四伏，劏房住人更加係計時炸彈。有人計過數，全港十七萬劏房住戶當中，大概有一萬人住喺工廈，其中唔少安全、逃生設備天殘地缺，對於呢個老大難問題，官老爺亦心知肚明，發展局早前就向立法會提出修例將工廈住用刑事化，屋宇署署長更加重申，工廈劏房必須全面取締添。問題係，講就容易囉，取締工廈劏房，唔通叫班無殼蝸牛瞓街咩？大家可能記得，同樣係葵涌工廈劏房，之前就有租客因為不滿業主收到屋宇署清拆令後，未有通知住客就進行迫遷，搞到佢哋無家可歸，要求當局做好安置工作。
呢個正正就係問題癥結嘞。房屋署最新數字顯示，公屋申請宗數近廿八萬宗，一般家庭平均輪候時間去到四點七年，平咗過去最長時間紀錄，好多人就係因為輪唔上公屋，焗住住劏房。前運房局局長張炳良最老實，講到明禁絕工廈劏房「不切實際」，新任發展局局長黃偉綸雖然講得隱晦少少，強調要喺市民住屋需求同生命安全之間作出平衡，明白一刀切處理「並非最理想」，但潛台詞無非都係對工廈劏房隻眼開隻眼閉，所謂「刑事化」、所謂「全面取締」，統統都係得個噏字！
所以話啫，劏房問題積重難返，講嚟講去都係港府拓土建屋不力種嘅禍，外國傳媒曾經形容劏房係「蝸居現象下嘅一顆膿瘡」，家陣港府仲要帶頭搞劏房，呢啲咪官不殺伯仁，伯仁為官而死囉！