政府公布高鐵一地兩檢方案之後，社會上對方案爭議不斷，民主派更將政府嘅一地兩檢方案形容為「割地方案」。作為自由黨黨魁嘅紡織及製衣界立法會議員鍾國斌尋日出席電台節目時就話，政府需要就一地兩檢解釋清楚，又話依家律政司司長袁國強喺部分法律問題上，仍然講得唔清唔楚，如果市民唔收貨，就會好容易出現入稟司法覆核嘅情況。咁又係，政壇一直盛傳袁國強喺呢屆政府未必做足五年，真係隨時劈炮都唔奇，又難怪佢咁hea，又點會理啲嘢係咪清清楚楚呢？
