政情：內地公幹 陳南祿驚塞車多過單車
依家好興自駕遊，不過唔同地方嘅駕駛規則及習慣都唔同，所以唔係個個都敢揸。香港中華總商會常務會董陳南祿就話，以前返內地公幹都會自己開車，最怕係周圍都有單車，啲人同單車隨時唔知喺邊個位走出嚟。不過依家返去就冇晒啲單車喇，反而係驚塞車多啲喎。
講起當年攞內地車牌，陳南祿話佢本身已有車牌，返去內地考個簡單嘅試就得，主要係睇吓佢讀唔讀得出係咩字、有冇色盲咁。不過依家佢已好少自己開車，做乘客居多。
見袁武即賣口乖
呢日係中總會員大會，陳南祿見到副會長袁武即賣口乖，話自己經常出席中總活動。
陳南祿又話當年冇乜人好似佢咁，喺英資公司工作卻加入中總，因為外資公司嘅人通常加入香港總商會，咁佢算唔算係行得好前？