中環出更：容永祺遊意 誤踩草地被趕
比薩斜塔係意大利地標建築之一，遊客去到擺出「托塔」姿勢更係例牌動作。專業及資深行政人員協會創會會長容永祺（Samuel）早前都去咗意大利旅行，首次參觀斜塔嘅Samuel都係擺出大路嘅「托塔」姿勢，但就誤入不准進入嘅草地禁區，結果被職員驅趕，成為蝦碌遊客。
帶隊甩轆 所到餐廳港設分店
Samuel經常到訪意國，但係佛羅倫斯就去得多，一直未有機會去比薩斜塔。所以趁今年公司舉辦旅行，請一眾員工遊覽意大利，順便到訪斜塔。佢哋抵埗後發現斜塔對出嘅草地人流稀疏，於是立刻佔據靚位擺甫士影相。
但係佢哋影咗一陣，就有職員走過嚟叫佢哋離開，原來嗰片草地係不准進入嘅禁區，難怪冇咩人喇！雖然好面懵，但Samuel都好開心，因為喺被趕走前影咗幾幅無人做「背景」嘅靚相囉！
此外，Samuel似乎唔係做好導遊嘅材料，皆因佢帶隊期間，竟然喺當地搵咗一間香港都設有分店嘅意大利餐廳，隨團嘅員工都唔知好嬲定好笑嘞！
卓妮