中環出更：港人搞藝術？ 郭偉強：有標時先得
香港不時被形容為文化藝術嘅沙漠，可能都同香港人嘅工作時間有關。早前香港區潮人聯會（聯會）同香港青年動力協會（協會）舉辦一個藝術展覽，畀學生展示藝術作品，立法會議員郭偉強都有到場。講到香港被指為文化沙漠，郭偉強話，香港嘅家長普遍覺得搞藝術搵唔到食，所以都希望仔女修讀商科，如果有標準工時，咁打工仔收工後都可以有時間發展一下其他興趣，唔使窮得只剩下錢喎。
去年升呢做爸爸嘅郭偉強話，如果佢嘅囝囝將來想學樂器，不論純粹只係想玩，定係大個之後用嚟搵食，佢都唔會反對。佢話自己細個嘅時候冇錢上興趣班，所以只能夠做吓運動、跑吓步，已經好開心。
汪紅話要諗計推「港文化」
協會主席汪紅就認為，香港嘅文化其實曾經紅極一時，好似電影及流行曲咁，曾經風靡東南亞、台灣同埋韓國添！不過依家就掉番轉頭，變咗香港人鍾意睇韓劇、追韓星。佢又話，聽過有啲台灣人話唔想嚟香港，因為覺得香港冇乜嘢睇，所以香港真係要好好諗計推廣自己嘅文化喇！
同場仲有聯會副會長余奕雄（Joseph）、聯會灣仔區幹事長兼副會長周錦威同埋參與是次展覽嘅平面設計師梁婼妮。本身係品酒師嘅Joseph對酒同食物嘅配搭非常講究，佢話香港人好注重飲食同打扮，其實衣食住行都係一種文化，故此從一個地方嘅飲食習慣，都可以反映到當地文化，仲好貼地添！
卓妮