政情：選舉落敗平常心 何君堯大耍八段錦

笑稱驚身體唔好會跣親

何君堯話，細個嘅時候操過兩嘢，由記憶中抽番出嚟，爸爸安排啲老師，教佢寫大字同八段錦，但係兩樣都半桶水，男人五十歲後，腿就會弱一啲，練吓就好啲，身體唔好就腳浮浮，跣一跣、步履不穩「就好大鑊」，所以年紀大咗就要保養好牙齒同腳，又話呢樣都可以套用喺政治上。

佢又提起律師會理事會選舉，泛民多年來都唔會觸及專業組織嘅選舉，今次政治影響專業，事件或多或少存在隱憂，又指自己喺律師會服務超過廿年，一直堅持專業同政治分清楚，亦唔想被指當選立法會議員後就放棄律師會工作，若開宗明義同佢講清楚，話佢做咗立法會議員同區議員，可唔可以讓出理事會位置畀新血，其實佢係接受嘅。

對於執業律師任建峰指今次當選者有唔同政治理念，但仍以專業為主，何君堯話「但願如此」，認為任建峰喺選舉過程中相當高調發表言論，「路人之心皆見」，並非專業問題。

佢又話冇乜時間打電話拉票，依家會以平常心面對事件，未來會喺唔同崗位繼續服務律師會。