政情：楊德強拆場變拆彈

同建制夾計 免炒熱議題

政府內部商討灣仔運動場喺一九年拆卸嘅問題時，原來民政事務局有啲做漏招，一九年適逢區議會選舉，呢個咁地區嘅議題，涉及灣仔居民嘅集體回憶，對選舉一定有影響，隨時被泛民炒起嚟，成功偷雞，後期有官員提出希望改日期，但已經太遲，於是最終嘅寫法變咗係「最快一九年」。

換言之，即係體育專員楊德強甩轆，送彈藥畀泛民炸自己喇！但點補鑊好呢？

據知，為免畀泛民炒得熱個議題，政府內部都同建制派夾定計，等建制派向外界講明，依家都係做研究先，唔會講到咁死一定拆，又講明要完成香港大球場嘅改建，先會拆卸灣仔運動場，希望以呢個市民較容易明白嘅方法，為事件降溫。

聲稱先做研究 圖息民怨

據知，其實政府內部都計過數，呢個項目要經城規程序，又要喺區議會討論等等，其實兩年可以肯定做唔切，所以一九年幾乎可以肯定唔會推出住，但如果喺研究後，最終真係拆灣仔運動場，香港大球場嘅改建亦未必完全做到無縫交接，目前估計平息民怨嘅關鍵係要為拆卸灣仔運動場搵出替代方案。

拆卸灣仔運動場，最大影響嘅係學運會同田徑訓練，據知政府初步估計，學運會可以改至小西灣運動場等運動場舉辦，至於田徑訓練方面，其中一個考慮係喺香港大球場加建跑道，等附近嘅居民可以入去跑吓步，但係最難處理嘅係擲鐵餅等部分田項訓練，因為對場地有擋網嘅位置等特別要求，估計若香港大球場真係要建呢啲設施，必須有較多嘅改建。

至於灣仔運動場嘅位置，除咗會建會議展覽場地外，目前亦考慮緊喺其他樓層建室內田徑訓練場地或七人足球場等，而為咗爭取地區支持亦可考慮引入條款，部分日子優先讓社區申請使用。

咁啱尋日喺一個活動上見到楊德強，佢話目前要等貿發局做研究，因為要好科學性去睇灣仔運動場事宜。至於會唔會喺一九年拆卸，佢話要視乎研究進度，而且需要進行諮詢喎。