中環出更：倘冇一地兩檢 蕭炯柱：踩單車上深圳
廣深港高鐵香港段行唔行一地兩檢都仲未有定案，基本法委員會副主任梁愛詩之前語出驚人，話如果唔實行一地兩檢就要炸咗成個西九龍總站重新規劃之後，前高官蕭炯柱尋日亦都開腔，講到明一地兩檢就算無得傾都要傾掂佢，仲話搞唔掂嘅話，不如以後都踩單車去深圳去坐快嘅火車喎。
稱要「拎個心」同內地官員傾
蕭炯柱尋日出席一個電台節目時，以佢當年喺港英政府曾擔任運輸司為例，指內地政府經佢用心解釋同商討後，終於促成雙方同意興建新機場，所以喺一地兩檢嘅問題上，即使無得傾、唔想解決都要解決，佢仲話同內地官員交流，需要「拎個心出嚟傾」。他又話「如果大家傾無用個心講，就唔好講啦，愈講就愈嬲，之後就大打出手，最後咪出軍隊囉，實得o架。」
其實高鐵呢個燙手山芋，由撥款、動工到通車都一直出事，要一地兩檢傾到有共識真係好有難度。但蕭炯柱就覺得成個計劃都係為香港人好，仲話如果傾唔掂嘅話，不如香港人以後要返內地嗰陣，都踩單車去深圳去轉快嘅火車喎。咁講法，即係暗示一地兩檢要事在必行啦！
卓妮