政情：怕關係惡化王淑筠仔女讀國際校
近年關於小學操練文化話題不斷，有唔少名人家長亦熱衷將子女送入名校。育有兩名子女嘅香港中小型企業總商會副會長王淑筠（Diana）都係讀傳統名校出身，佢話體驗過嗰種讀書壓力，覺得人生除咗讀書仲有好多嘢，所以佢安排子女讀國際學校，唔想佢哋讀得太辛苦。
Diana仲分享一個令人心噏嘅真人故事。話說佢身邊有唔少家長朋友，原本成功送子女入名校之後好開心，點知係噩夢嘅開始，事關家長同小朋友嘅關係因為功課問題而轉差。其中有個媽媽講番親身經歷話，有一次佢個小朋友趁佢唔留意，竟然喺佢杯咖啡落膠水同埋擦紙膠碎，可見呢位小朋友真係好唔鍾意媽媽囉！
Diana感慨話，生個小朋友出嚟，都係想佢開心啫，點解搞到咁嘅地步？所以佢自從子女出世後，就帶佢哋踩單車、上興趣班。最近細仔成功報讀家姐讀緊嘅國際學校，佢就放晒心喇！