中環出更：欺凌罩港大 梁志祥寧女兒放洋
香港大學作為香港最高學府，唔少莘莘學子都想考好公開試繼而入讀港大。不過，港大近期爆出宿舍欺凌事件，仲愈揭愈多，搞到立法會議員梁志祥都怕怕，話唔想細女入大學變成入地獄，考慮送佢去外國升學添！
擔心入大學變入地獄
梁志祥嘅細女出年將考公開試，更以讀法律為目標，而港大法律系最出名，所以梁志祥都希望佢能夠順利入讀。但近期港大屢傳欺凌事件，梁志祥話如果囡囡入到港大，可能唔畀佢住宿舍，因為擔心入大學變咗入地獄，情願佢日日由新界西過海返學。
不過跨區返學好辛苦，梁志祥就話不如喺校園附近租樓，但係諗諗吓，佢嫌費用太貴，如果要行呢一步不如去外國讀仲好。
其實梁志祥嘅大仔都係港大畢業生，當年只能以後備身份入住宿舍。佢話大仔住宿舍期間，都有同啲學長玩吓，但手法健康得多，只係跑樓梯、唱歌啫，所以相信欺凌只係個別事件，唔係宿舍嘅普遍風氣喎！
卓妮