中環出更：鄧鉅明白髮真身示人老婆安心

Jimmy不改鍾意講笑本色，話依家老婆終於瞓得着，因為以前如果有女仔望多佢一眼，佢會諗對方係咪對佢有意思，依家顯露「真面目」之後，只會諗對方係咪想打荷包喎！鄧太就笑稱，如果Jimmy剪埋先前染咗嘅黑色髮尾就好睇啲喇！

郭羅桂珍訂製音樂盒顯心思

講番就職典禮，今屆主席陳細潔嘅家姐劉陳小寶都做過保良局主席，兩姊妹相隔十年先後出任主席，認真有善心。當日亦頒發全年籌款成績優異獎，冠軍係總理譚毓楨（Jenny），鄧太就攞到季軍。兩人都話要多謝朋友嘅支持，亦不約而同對教育最上心。鄧太捐咗九十幾萬支持明日之星獎助學金，希望支援小朋友發展課外興趣。Jenny就話依家社會咁撕裂，會盡力培養下一代正確嘅價值觀。

卸任主席郭羅桂珍好有心思，訂造咗個立體卡通公仔音樂盒，入邊有齊上一屆董事局成員嘅模樣，仲有重建東翼大樓嘅模型，同埋載有董事局成員出席活動相片嘅電子相架，至於播放嘅音樂就係局歌。咁可愛又有紀念性嘅音樂盒，每個董事局成員都有份，真係夠晒特別。

陳細潔（左）同家姐劉陳小寶（右）先後出任保良局主席。	郭羅桂珍精心訂造嘅卡通公仔音樂盒。（受訪者提供）	譚毓楨「吸水力」強勁，取得全年籌款冠軍。

卓妮