港產官僚成日畀人批評胡混度日，得過且過，好在凡事都有例外，好似入境處咁，喺遏止假難民方面嘅落力表現，有目共睹，正正係典型例子。
數字無花無假。自從港府三年前推出同時處理酷刑、不人道待遇及迫害三項免遣返聲請嘅統一審核機制，入境處積極配合，終於取得初步成果。新聲請個案由之前每月平均四百六十宗，減少六成至今年頭兩個月嘅一百八十多宗；截獲嘅非華裔偷渡客亦由前年平均每月三百幾人，大跌八成至今年平均每月約六十人，幅度都咪話唔驚人。
有學者就講得啱嘞，《東方日報》鍥而不捨揭發假難民問題，加上假難民作案不絕令市民不滿，當局喺巨大壓力下，想唔做番啲嘢都唔得。之不過咁喎，香港講到底都係彈丸之地，資源有限，而假難民源源不絕，以有涯隨無涯，即使增加幾多人手處理審核個案，都係嘥氣嘅啫。
呢嗱，唔係杞人憂天o架。粵港澳有關部門自今年起採取聯合反偷渡行動，偵破嘅偷渡案件以及拘捕人數，分別比舊年同期上升兩成同四成七；國家禁毒委員會報告亦顯示，非洲同南亞裔人士在華販毒活動呈增多趨勢。值得注意嘅係，無論係偷渡客抑或販毒組織，當中唔少都係以香港為目的地，亦即係話，本港免遣返聲請個案減少其實只係表象，如果唔係內地當局把關，問題只會更加嚴重嘅咋。
可能大家會問，點解犯罪分子特別鍾情香港？鬼咩，蒼蠅不叮無縫的蛋，假難民嚟到香港，只要舉手聲請免遣返，食嘅住嘅全部由港府照起唔在講，滯港期間打黑工，幫本地黑幫賣命，總之搵快錢唔愁冇門路，再唔係狀告港府「不人道對待」，話唔定可以博得仁慈法官重金禮送回鄉。假難民返到去一傳十，十傳百，同鄉自然「慕名而來」。據講印度有中介公司公然喺求職網站登「香港急聘難民」廣告，雖然要交四萬幾港元申請費，一樣其門若市，問你怕未！
講嚟講去，來港「掘金」誘因一日存在，假難民一日都會前赴後繼。大家有眼見，兩岸四地中唯獨香港有假難民問題，事關內地同台、澳當局對人蛇即捕即解，假難民根本無利可圖。即使係向來講究人權嘅澳洲，打擊非法入境者一樣冇手軟，喺離島及境外設立禁閉式難民營，以防國內良民受到滋擾，港府幾時至肯學吓嘢呢？
冇錯嘞，今屆政府打擊假難民講多過做，市民早就忍無可忍，新特首上場可唔可以帶嚟新氣象，下大決心為民除害，大家不妨金睛火眼（目及）實。