政情：劉國勳落雨靠老婆帶遮
雨季又開始，帶把遮喺手就最穩陣。話說立法會議員劉國勳早前出席新家園協會嘅一個活動時，咁啱就落大雨，但佢就話自己一向唔鍾意帶任何雨具出街，因為唔鍾意對手攞住啲嘢，覺得有啲麻煩，除非真係落好大雨先會帶。
嫌麻煩唔肯手拎
咁佢咪成日都會淋雨？劉國勳話，自己相當留意天氣情況，如果只係毛毛雨，就一定唔會帶遮，即使大雨，如果到達會場前都係有瓦遮頭，佢亦唔會帶，最多只係拜託主辦單位幫佢預備把遮，正如嗰次揸住嗰把遮都係大會幫佢準備嘅。
之不過，佢話太太呂迪明就好唔同，無論有冇落雨，都一定會帶住把遮，可以用嚟遮吓太陽吖嘛，佢有時都係靠太太把遮擋雨咋！