政情：施榮懷錯穿鴛鴦鞋 撞啱潮流
喺啱啱過咗嘅特首選舉，好多選委一早就出門去投票，但匆忙中總有甩漏。香港中華廠商聯合會（廠商會）永遠名譽會長施榮懷日前就上載咗張相上網，話自己匆忙間竟然着咗鴛鴦鞋投票。不過佢就大方公開幽自己一默，將錯就錯順便為大家製造歡樂，估唔到仲變咗潮着添！
施榮懷話當日去到會場坐低後，同百仁基金副主席陳寧寧同羅詠詩傾開偈，講起依家着輕便鞋襯西裝好方便，公幹時一對鞋可以襯晒西裝同便服，行遠路都唔怕攰，正打算伸對腳出嚟介紹畀朋友睇時先發現着咗鴛鴦鞋，即時忍俊不禁。
不過，雖然兩隻鞋唔同款唔同布料，但都係黑色，所以唔望真啲其實唔係好覺，最搞笑係一班朋友見到之後仲留言大讚佢帶領潮流同有型添，話依家潮興喎。咁又係，國際著名珠寶設計師羅啟妍都係着鴛鴦鞋着到出神入化嘅表表者，連褲都試過鴛鴦色，鴛鴦鞋又有乜好怕。
難忘五年前酒樓遇小強
講番選舉，施榮懷仲分享咗五年前三月二十六日，佢同十位選委投完票之後一齊飲茶，廠商會副會長吳清煥夾咗個包畀佢，點知十位唔怕動物的選委，就齊齊畀包入面嘅小強嚇親，仲拉隊離場添，廠商會副會長楊志雄都忍唔住留言話記憶猶新呀！