政情：立會補選建制混戰

葉劉尋日接受電台訪問時話，民建聯（民記）會成為今次特首選舉中嘅大贏家，相信未來會為政府輸出大量人才，因為民記人多咁話喎！葉劉未知係咪發現新民黨規劃遠不及大黨，所以就首度開腔話政黨未來要準備兩場立法會選舉補選，希望能夠贏取議席，令到呢場選戰再添混亂，實行同工聯會（工記）同民記大玩泥漿摔角！

民記早前為補選進行黨內初選，選出為新東同九西兩區參選嘅人選，其中九西現時只得蔣麗芸一名立法會議員，據了解民記特別希望可以透過今次補選攞多一席，盡早插定旗霸定兩個席位。

鄧家彪選情更慘淡

今次民記初選投票期早已結束，據悉點票工作亦已完成，但就遲遲唔肯公布票數，連幾位參選人都唔知勝負誰屬。神神秘秘咁，黨內亦有人質疑點解唔索性推遲初選日期，反正選完結果唔係立即公布喎。不過，有中委透露早就決定唔會立即公布結果，而現時賽果只有極少數人知悉，估計需要時間同其他建制派進行協調，尤其對係咪派人落新東都有所保留。依家新民黨加入戰團相信會影響民記嘅部署同協調工作，因為新民黨樁腳集中喺新界，民記或者怕讓步會壯大新民黨嘅聲勢都未定。

另外，立法會前議員、工記鄧家彪早已勤力落區做準備，可謂戰意高昂，但有政界人士分析，工記喺新東同九西嘅地區樁腳極少，兩區夾埋只得五名區議員，而且工記以勞工及基層作定位嘅吸引力有限。照咁講法，選情早被看低一線嘅鄧家彪，隨住有更多建制派有意出選而變得更慘淡嘞！

泛民同樣難以協調

建制派方面競爭激烈，其實泛民方面亦都一樣，唔少政黨睇中難得再下一城嘅機會，希望爭取機會畀黨內第二梯隊上位，而上年立法會選舉中連任失敗嘅前議員亦都希望借補選復活，包括工黨李卓人、民協馮檢基同新民主同盟范國威等，之不過協調唔到邊個出選，隨時又益咗建制派喇！