中環出更：已計劃退休 梁栢賢唔入熱廚房
人稱「PY」嘅醫院管理局行政總裁梁栢賢一向都係「波牛」，佢尋日喺facebook（fb）上載一段短片，原來佢趁周日特首選舉，同班香港華仁書院老友記返咗母校踢波。PY成日講醫護團隊合作精神，當日都有份助攻，製造機會畀隊友入球。咦，依家適逢下屆政府籌組緊新管治班子，PY講助攻係咪隱喻唔入熱廚房？抑或係幫人助攻入去？係嘅話又幫邊個？
返中學踢波展腳法
平日出鏡西裝骨骨嘅PY話，今年係畢業四十周年，一班中學同學聚會嘅機會因而多咗，所以都返母校踢波，回憶吓讀書時感覺。球衣設計都好有心思，右上角有「77」數字。吓！又係7？咪諗錯隔籬喇，係代表佢哋一九七七年畢業，象徵手足情深。佢哋事前仲要問准校方先可以用校徽o架！
喺fb嘅短片只見到身穿長褲嘅PY交波畀隊友入球，最後究竟有無贏？PY話十比八贏咗，而大家都係自己人，唔會計較輸贏。喺球場上，PY就助攻畀隊友入波，咁公共衞生政策經驗豐富嘅佢又有冇被邀請加入政府幫手助攻呢？佢就話希望兩年後喺醫管局退休，好好休息喎。
卓妮