中環出更：名媛法國做「織女」展露性格
太子珠寶鐘錶副主席鄧宣宏雁（Emily）同愛沙尼亞共和國駐港名譽領事林建康嘅太太林黃寧艷（Lianne），早前獲品牌邀請到法國巴黎玩足一星期。今次行程最得意係參觀一間教人做針黹嘅學校，佢哋仲做「織女」，落手落腳學織布及設計做手工釘繡。平時斯文淡定嘅Emily，結果被老師睇出佢嘅性格屬奔放型，點解？
Emily笑笑口話做襟花釘繡時要自己設計圖案，佢畫咗一朵花，好快手就搞掂。老師話藉此可以睇到一個人嘅性格，形容佢屬於奔放型，同Lianne慢工出細貨大異其趣。Emily話自己嘅性格內斂，細個時唔太講嘢，但係確實比較心急，後來受到老公鄧鉅明影響，先至比較多嘢講咋！Lianne就形容自己比較細心，做釘繡時真係唔夠Emily快。
無懼恐襲 歎美食遊名勝
今次學織布仲令Emily諗起細個一段回憶。話說佢放暑假都會去搵婆婆玩，婆婆好鍾意做針線手藝，佢就跟住做，所以都識少少。今次重新拎起針線，發覺自己做得幾熟喎。
除咗學做「織女」，佢哋同一班靚女友人仲去歎美食、參觀名人故居，有一晚就去咗間好特別嘅酒店參加酒會，酒店場地布置仲好似圖書館咁，眾人梗要影張靚相留念喇！
最近英法兩國接連受到恐怖襲擊，令唔少遊客怕怕。不過Lianne話今次全程有專車接送，唔擔心，下月中佢仲會帶細仔去倫敦住一個月添，因為佢哋喺倫敦有屋嘛！
卓妮