政情：梁詠恩獲「婦女勇氣獎」盼增中性廁所
跨性別資源中心創辦人及主席梁詠恩（Joanne）尋日獲美國駐港總領館頒發「婦女勇氣獎」，表揚佢具有勇氣同領導才能。作為跨性別人士嘅Joanne就分享多年經歷，更希望香港能夠多增加中性廁所添！
Joanne以過來人身份指，接受變性手術後會帶同醫生紙，叫女性朋友陪同先敢去廁所，但適應後已經習慣去女廁，唔覺得難受。
佢希望有中性廁所，因為部分女士認為跨性別人士曾經作為男性，用同一個廁所會覺得唔自在，所以增加中性廁所可避免強迫其他人接受佢哋，都可以畀跨性別人士多一個選擇。佢又話搵工會感到困難，因為簡介寫上女性，但卻畢業於男校，所以要花額外時間解釋。但佢就唔介意畀人話「人妖」，認為對方只係唔了解跨性別人士啫，難怪佢咁致力令社會認識跨性別人士喇！