今日係三八婦女節，梗係女人大晒啦！但細佬想話畀女士們知，其實國際婦女節成立目的係為慶祝婦女喺經濟、政治同社會等領域上作出貢獻，所以唔係畀港女有藉口食餐勁或瘋狂Shopping囉！如果以為準時返工或洗兩隻碗都叫貢獻，咁你真係要睇吓地球上最「偉大」嘅女性，乜嘢叫拋個身出嚟呀！
甚少港女會睇四仔，所以唔明白色情工業運作，男人唔怪你，但請不要太無知，好多女人仲以為四仔除咗脫星係女外，其餘所有工作崗位都係男人玩晒。事實上衝出國際攞晒獎嘅四仔女導演及女攝影師都有唔少，其中一個你一定要識，就係嚟自瑞典嘅Erika Lust，絕對係當今男女「性解放」重要一員呀！
由2004年喺西班牙拍攝四仔免費網絡下載開始，短短兩個月就有200萬次瀏覽，Erika姐嘅作品風靡全球，尤其係歐洲女士勁Buy，事關佢係女權主義者。Erika之所以唔理世俗眼光拍四仔，原來係因為童年回憶，佢自爆睇過無數四仔，不但冇高潮仲換嚟一肚火，皆因市場上所有作品純為滿足男觀眾，劇情荒謬，兼且貶低女性，為咗改變業界「男尊女卑」嘅極權，Erika自覺有責任要企出嚟為女人平反，講得出做得到，呢啲咪值得尊敬囉！
未有四仔出現之前，史上第一個喺銀幕上裸體演出嘅女性係邊個你知唔知？佢就係於1914年喺奧地利維也納出生嘅Hedy Lamarr喇！1933年20歲嘅Hedy Lamarr拍攝捷克電影《Ecstasy》，於戲中有裸泳及全裸喺森林奔跑嘅場面，成為全球第一位喺螢幕全裸演出嘅女主角！之不過，Hedy Lamarr對於世界貢獻同裸體完全無關，查實佢係極少數女發明家，更有「無線通訊之母」之稱。1937年Hedy Lamarr發現以鋼琴自動彈奏原理，可應用於無線遙控魚雷上，令無線遙控魚雷通訊頻率不斷改變，避開敵方截取。該專利喺1942年8月11日通過授權，命名為「保密通訊系統」，無奈當時社會根本冇人將呢個發明當一回事，最終遲咗20先開始使用，而隨着手機發展，成為今日人所共知嘅無線通訊基礎，包括Wi-Fi技術，可悲嘅係到Hedy離世嗰日，都無分過一蚊專利費囉！
你唔識佢，但英國劍橋大學一定好尊敬佢，皆因Shelley Lubben由四仔脫星變咗做牧師，喺2011年被劍橋聯合會（The Cambridge Union Society）邀請嚟一場「色情業是否對公眾有益」辯論，但咪以為阿姐係撐色情業噃，相反，佢之所以離開係因為色情業界係「大染缸」，摧毀女性一生，製造不少性病加重社會負擔。其後佢成立粉紅色十字基金會（Pink Cross Foundation），專責幫助四仔界男女演員，亦喺多個公開論壇演講，分享色情行業嘅危險及辛酸。Shelley Lubben「拯救過」唔少新入行嘅脫星出火坑，相信全球好多男人都唔妥佢囉！
四仔界值得尊敬嘅女性多到數唔晒，唔知係咪因為行業被打壓得多，唔少有番咁上下資歷嘅脫星退下火線後都主動從政，將慾火轉化成怒火！
Stormy Daniels喺2010年宣布參選路易斯安那州參議院議員，當時好多人撐佢，期間佢嘅競選經理收到汽車炸彈襲擊警告，最終宣布退選。
Nikki Benz係烏克蘭及加拿大混血兒，2014年宣布參選多倫多市長，以「多倫多最性感市長候選人」自居，承諾當選後會大幅降低稅率，同時將色情業引入多倫多，據聞登記當日，因交唔齊資料冇人幫佢辦理！
Marilyn Chamber喺1972年演出成人電影《Behind the Green Door》一炮而紅，亦係美國史上第一部大規模喺院線上映嘅成人電影，涉及SM題材，片中Marilyn Chamber同黑男大戰，打破當年黑白同床禁忌。電影以低成本製作，但大收3,000萬美元票房，Marilyn Chamber居功不少。喺2004及2008年Marilyn兩度參選美國副總統，可惜落敗。Marilyn並於2009年離世，享年56歲。
Dolly Buster原名叫做Nora Baumberger，捷克出生現年47歲，做過德國四仔製片、導演兼脫星，歷來演出超過100套四仔，引退之後，喺2004年歐洲議會（European Parliament）取得一席，成為直選議員。
Mary Carey今年36歲，美國四仔巨乳脫星，憑36DD起朵，喺2003年競選加州州長成為一時佳話，最終落選。2005年6月受布殊總統邀請參加白宮晚宴，成為美國歷史上第一位同總統進餐嘅色情演員！到 2006年8月再度宣布參選州長，最後以照顧母親為由退選。
Emilia Cucciniello係意大利脫星，80年代開始以Milly D'Abbraccio行走江湖，退下火線之後，2008年羅馬市議會選舉落敗，但無損阿姐熱誠，2011年同另一位脫星Dopo Cicciolina 競逐蒙扎市市長，結果都係衰咗！
Ilona Staller於1951年出生，匈牙利妹一名，亞洲巴打以「小白菜」相稱，拍近40套四仔，喺1987至1992年間曾任意大利國會議員，主張人權平等、自由意志及反核能，係首位成人電影演員進入國會先例。佢最爆嘅公開講話係於波斯灣戰爭期間，揚言以性愛作交易，要求侯賽因釋放人質。
Melody Damayo又名Mimi Miyagi，1973年出生，於美國洛杉磯長大，1992年由脫衣舞孃轉戰床上脫星，憑住超假32DD巨咪及亞裔面孔起朵，演出過百套四仔，直到1996年全面退下火線，跟住搞成人雜誌。2001年離婚後，全力瞓身人道及動物組織，幫助菲律賓貧困兒童，2006年加入共和黨，喺內華達州參選議員，最終落選，於是轉投自由黨，2007年復出客串主流電影，2012年又去做網絡潮流雜誌記者，犀利！
撰文：祖