政情：葉劉隧道口競選廣告改作謝票
新民黨主席兼立法會議員葉劉淑儀（葉劉）雄心勃勃參加特首選舉，點知就因為攞唔到足夠提名票而被迫宣布放棄參選。不過，原來葉劉嘅競選工程並未完結。葉劉原本為咗特首選舉，買咗十三個喺隧道口嘅廣告位，使用期到三月底，即本月二十六日特首選舉日後，但由於依家未能成為特首選舉候選人，所以就打算改作「謝票」用。葉劉仲話，佢日前已拍攝咗全新一輯「謝票相」，隨時可以「登場」。
去信衞生事務委員會要求入會
購買隧道口廣告位應該所費不菲，至於費用係咪要「六位數字」，葉劉就未有透露，只係話「謝票相」係由佢幫襯開嘅製作公司影嘅，唔使好多錢，立法會選舉時嘅宣傳品都係呢間公司出品。唔知道葉劉會唔會將已購買嘅廣告位轉售畀其他特首候選人，當作幫補下呢？
另外，葉劉棄選後就去信立法會衞生事務委員會要求「入會」，佢解釋係因為早前接觸衞生服務界選委後，「對衞生政策和議題有了新的感悟」，希望喺有關議題有所貢獻喎。