政情：泛民怪招阻撥款 波哥頭痕
立法會財務委員會早前開始審議涉一百二十四億元嘅「基本工程儲備基金」撥款申請，民主派議員因不滿政府將橫洲在內嘅二十六個爭議性項目綑綁審議，就喺會議上發動拉布。有份拉布嘅議員朱凱廸計劃喺下周五嘅會議上提出議案，要求檢討撥款機制。不過，財委會主席陳健波（波哥）就話修改機制涉及法律考慮，仲擔心會成為新拉布機制，暫時未決定批唔批動議，直言「頭都大埋」。
倡將個別項目獨立審議
朱凱廸話計劃喺會議上按照《財務委員會會議程序》第廿一條提出議案，要求檢討撥款機制，建議學似立法會大會呈請書嘅方式，喺二十個議員書面要求下，將個別項目獨立審議。佢仲話如果議案獲得通過，民主派會作出讓步，喺二十六個爭議項目中，僅將有關橫洲發展嘅項目剔走，若議案不獲通過，佢會喺有限嘅空間下抗爭。咁即係再拉布喇！
支持議案嘅建築界議員姚松炎就指，政府喺一三至一四年度曾喺議員要求下，抽起擴建堆填區嘅工程同前期研究，認為係有先例可循。佢又話檢討撥款方式完全係有法理依據。
但波哥話目前財委會時間緊迫，覺得制度改革嘅嘢可以喺四、五月以特別會議方式處理，以免耽誤撥款進度。佢話朱凱廸嘅建議涉及法律考慮，需要諮詢法律意見，佢會喺下周五之前回覆。但佢擔心，通過咗朱凱廸嘅建議財委會將會永無寧日，事關每個議員都可以就每個項目，要求抽出審議，將會成為新嘅拉布機制，所以要從長計議喎。