政情：特首戰倘流選小肥張家山有福
特首選舉最終結果難測，但政府亦有兩手準備，萬一出現中央不任命的情況，會喺七月一日之後一百二十日後重新選過，期間會由現屆政府嘅政務司司長署任特首。工聯會立法會議員黃國健（KK）尋日出席一個節目時就大講風涼說話，話流選都唔係大問題，仲話如果真係流選，依家嘅政務司司長張建宗（小肥張）就「家山有福」嘞，可以暫代做幾個月特首添！唔知小肥張聽到佢咁講係咪流晒口水？會唔會求神拜佛，希望真係流選呢？
KK尋日出席由民主黨前主席劉慧卿（卿姐）主持嘅節目時分析選情，話上屆「唔聽話」嘅建制派選委有成百幾二百人，加上呢次選舉泛民主派有成三百幾票，所以只要一日未投票，大家都講唔定之後會發生啲乜嘢事喎！KK又話，即使流選都唔係大問題，仲話如果真係流選，小肥張就「家山有福」，可以做幾個月特首。
KK：流選可能性低於一半
對於政界一直盛傳七月一日會有國家領導人來港，卿姐就擔心如果七一都未選到特首會影響領導人對香港嘅觀感。但KK就話，雖然現行制度容許流選出現，但估計發生嘅可能性未必高過百分之五十喎！
由於政府高層辭職選特首，原本做緊勞工及福利局局長嘅小肥張，喺一月中就「冷手執個熱煎堆」，升呢做司長，聽到KK咁講，小肥張仲有可能再上層樓做特首喎，雖則幾個月貨仔都好過冇吖！若果佢真係要坐上呢個位，睇怕要求神拜佛，希望流選成真嘞！
喺今次選舉中，手握逾六十張提名票嘅工聯會無提名過任何一人，卿姐就替入唔到閘嘅葉劉淑儀感到不值，直指覺得葉劉好慘，曾為國家戰死過沙場、忠心耿耿，政改投票時又「不問因由」就跟隨工聯會行出會議廳，反問工聯會一票都唔攞嚟提名佢係唔係好過分？
雖然KK話體諒葉劉嘅心情，又指工聯會同佢關係好好，仲話當年佢辭官去美國讀書時，淨係得番工聯會為佢搞「千人大型歡送會」，叫佢要諗吓點解會唔提名佢喎。