中環出更：徐巧嬌與時並進唔逼仔女結婚生仔
現代女性唔易做，隨時代轉變面對生活上各種挑戰及壓力，少啲耐性都唔得。早前各界婦女聯合協進會及多個界別的婦女團體舉辦晚宴慶祝三八婦女節，卓妮見到時裝品牌老闆娘徐巧嬌（Shirley），講起以前啲人成日話生仔係女士天職，但依家好多年輕夫婦都選擇唔生育，佢就話唔會強迫小朋友接受自己嘅諗法。
有三個仔女嘅Shirley話，自己係嗰種覺得要結婚然後生小朋友先夠美滿嘅人，佢好享受一家天倫樂嘅時間，仲因為咁而將屋企嘅長方形枱換咗做大圓枱，最熱鬧嘅時候坐到十八個人，而自己亦覺得有兄弟姊妹嘅小朋友冇咁寂寞，溝通技巧都好啲。雖然佢都好想快啲抱孫，但就話明白依家已經唔同年代，唔會強迫仔女結婚生小朋友，等佢哋自己安排。
湯振玲向朱穎詩取湊仔經
轉頭見到兩位窈窕女士好啱傾，原來係仁濟醫院副主席王賢訊嘅太太朱穎詩（Vincci）及仁濟總理湯振玲。原來湯振玲早五個月前生咗個小朋友，所以正向有三個仔女嘅Vincci取經。佢哋仲笑言仁濟好旺丁，董事局入面唔少成員都有三四個小朋友，剛生第一個小朋友嘅湯振玲就話目標生兩至三個。
講起現時部分女士要求男士有樓先結婚，又擔心會有婆媳問題，而金紫荊女企業家協會主席彭芷筠係同奶奶一齊住，佢認為相處嘅秘訣都係講尊重同關心，笑言奶奶錫佢仲多過錫佢老公。婦協青年領袖小組委員會委員陳淑芝都話奶奶好錫佢，事關佢每年都會負責計劃大家一齊去旅行，難怪冧得奶奶咁掂啦！
卓妮