有人話，人類總要重複犯錯。好似禽流感吖，自九七年香港成為首發地之後，世界各地幾乎每年都有人中招甚至死亡，證明各地政府始終冇做好防疫把關，加上老百姓缺乏安全意識，掉以輕心，結果咪賴晒嘢囉。
話口未完，新一波疫情又殺到嘞，歐洲中招，日本、南韓、台灣、澳門亦未能幸免，最大鑊嘅係內地成為重災區，至今已錄得逾三百宗人類確診H7N9個案。淨係廣州咋，全市十一個區嘅禽類市場都驗出病毒，七個區出現人類感染病例，搞到當地政府拿拿聲將本月休市三日延長為休市十三日進行大清洗，即係所有街市成個二月都要冚旗，咁大陣仗，就知疫情非比尋常喇。
可惜吖，好多人硬係唔見棺材唔流眼淚。呢，本報記者直擊深圳有街市檔販偷賣活雞後，當局係就係即刻搵人掃場，但所謂上有政策下有對策，雞販見有利可圖，根本唔會輕易收手，只不過由地面轉入地下，做得鬼祟啲咁解咋。本報記者假扮顧客向雞販買雞，結果等咗半粒鐘，雞販就從秘密倉庫取出活雞即場屠宰。至於深圳郊區咯喎，由於山高皇帝遠，雞販直情大模廝樣喺大街殺雞賣雞，仲吸引唔少識途港人光顧添，求其搵滾水淥吓就帶番香港，你話病毒攻破香港大門係咪話都冇咁易吖？
真係諗極唔明，唔通口腹之欲仲緊要過條命仔嘅？唔通賺錢真係要搵命博嘅？係人都知，深圳早就下令全面禁售活禽，但有求就有供，正因為大多數人都嗜吃鮮雞，雞販先至會鋌而走險，病毒先至會有機可乘。大家再唔改變飲食習慣，盞自己攞嚟衰嘅咋。
話時話，經歷過沙士慘痛一役，內地當局終於明白最好嘅抗疫方法係開誠布公，所以今次禽流感嘅訊息都好公開透明，值得肯定。之但係港府就羞家咯，唔止後知後覺，仲直情不知不覺，除咗循例呼籲市民提高警惕就關人個關，好似冇事發生咁款。喂，家陣講緊嘅係致命病毒呀，隨時死得人o架，何況香港已有四宗外來傳入個案，當中一人死亡。港府一味唔嗲唔吊，試問市民又點會有危機意識呢？咁即係靠害啫。
冇計咯，夕陽政府時日無多，官員唔係諗住捲鋪蓋走人就係心大心細，仲有幾多精神放喺防疫方面，唔使講都知。家陣特首選舉臨近，整個社會都患上政治狂熱病，冇乜人關心生死攸關嘅防疫問題。咪話功夫茶唔提醒，危機往往喺最意想不到嘅時候及地方爆發，當局繼續胡混度日，市民繼續麻痹大意，遲早爆大鑊嘅咋。