特首參選人之一的曾俊華，是曾hea做十年嘅「天才」，一向有斷估冇痛苦，其競選政綱洋洋七十多頁，佢話廿三條立法和重啟政改要喺二○二○年前進行，前者迎合建制派，後者迎合泛民。阿哥，你估你真係識打迷蹤拳呀？之前又話冇信心廿三條立法喺三年內可以完成，前言不對後語，有泛民以為你比林鄭守規矩，老朽倒認為你原來夠滑頭！
鬍鬚曾日前表示：「很多事人在江湖亦有很多方面的考慮，這我也很了解。其實我一直都說，我是想爭取整個政治光譜每一部分支持，這才可以代表到有整個社會的支持。選舉前是講政治，選舉之後是講管治……」想一得二，人性貪婪，可以理解；然而，鬍鬚曾似乎胃口大過鯊魚，你何德何能令整個社會都支持你？
你嘅房屋政策又話要為六成市民提供公營房屋作居所，「史上最廢財爺」搖身一變成為「史上最爛吹水王」，梁振英哽咽着說「粒粒皆辛苦」餘音尚存，而你竟如孫大聖拔條毛一吹，便有「廣廈千萬間，大庇天下寒士俱歡顏」之絕技！之但係參選政綱如此吹呀吹，被視為「向利益集團送出億萬大禮」有之，「處處可見左中右逢迎」有之。選舉前講政治，都唔係完全不顧政治倫理、各方茶禮都收啩？
俗語有話，貪字得個貧，好似見到十隻雞，你到底想抓哪一隻？有些人一會兒抓這隻，轉頭又去抓另一隻，到頭來一隻都抓不住。如今鬍鬚曾下巴輕輕，若真係畀你選贏，選舉之後如何講管治？政治宣傳離事實太遠，那叫不文明、野蠻的宣傳。
柏楊說過：「一個沒有政治頭腦的人，卻坐在必須有政治頭腦才能坐的板櫈上，實在是一種災難，他的最大特徵是，深信憑他主觀的意志和手中的那點權柄，就可以隨心所欲，使太陽從西邊升起。」這幾句話彷佛是為鬍鬚曾而寫的。