政府租用商廈嚟做候任特首辦公室，開支預算達四千萬元，較五年前大幅增加近四倍，仲只係用三個月啫！喺被議員狂轟「洗腳唔抹腳」同唔環保之後，行政署終於跪低，尋日話會將原來近一千五百萬元嘅裝修費用，減至一千零三十二萬元，減幅達三成一。點減磅呢？原來係將油漆代替牆紙，重用裝修物料等簡約嘅設計咁喎。老實講，行政署署長蔡潔如應該早喺籌劃階段就諗到乜嘢係應使得使，硬係要畀人鬧完大花筒之後先補鑊，呢啲咪自己攞嚟衰囉！
