政情：涉屈懲教虐囚 鄭松泰又「惹蟻」
立法會議員鄭松泰早前因將建制派座位上嘅五星旗同區旗倒轉，被議員謝偉俊動議譴責，更有可能因而失去議員資格。負責嘅調查委員會仍未開會，但另一名議員葛珮帆（EQ）亦計劃就鄭松泰涉誣衊懲教虐囚一事提出譴責動議，一不離二，鄭松泰真係一身蟻喇！
鄭松泰喺上月初召開記者會，指控懲教人員虐打大嶼山塘福懲教所一名三十七歲姓曾男囚犯，令其肋骨斷裂及腎臟出血，其後就事件報警求助。但警方深入調查後發現，該名囚犯純粹因病入院，並非被襲，亦唔涉及任何刑事成分。懲教事務職員協會事後強烈譴責佢發布失實內容，要求佢道歉。
葛珮帆提出譴責動議
EQ尋日透露，懲教事務職員協會曾就事件去信立法會主席梁君彥，要求喺議員利益申報委員會處理鄭松泰發表失實言論，惟主席指事件並非委員處理範圍而拒絕。而佢就計劃就鄭松泰發表失實言論一事，以行為不檢為理由向立法會內務委員會提出譴責動議，並已通知建制派議員，佢認為議員嘅言行要對公眾負責，胡亂發表失實言論後亦要承擔後果。
鄭松泰接受查詢時指斥有關行為「低能」，認為自己無必要道歉，又話議員嘅職責係就政府嘅服務或做法提出質詢，強調當時係因為家屬同醫生嘅報告都顯示犯人有被打嘅嫌疑，故召開記者會並報警係希望查明真相。佢又批評建制派議員上綱上線，以行政手段欺壓少數聲音，估計自己因為對建制派議員威脅大而被針對。