政情：日本最高榮譽 黃傑龍成「酒匠」
日本酒近年備受港人愛戴，香港餐飲聯業協會會董黃傑龍（Simon）日前就喺東京出席咗一個傳統儀式，並獲日本政府承認其「榮譽唎酒師酒匠」嘅資格，係日本酒界最高榮譽。Simon話出雲市神社供奉嘅清酒神喺當日被請到東京，而受章者嘅名字會一一向酒神品上。
Simon解釋，唎酒師等同平日講開嘅試酒師，喺日本係好專業嘅資格，需要經過考試考核，而榮譽唎酒師酒匠比榮譽唎酒師再高一級，而佢就係歷來第二個香港人獲此榮銜。
講番酒神，Simon話日本古代只係得清酒，所以傳統日本嘅唎酒師都係以品清酒為主，但隨着時代進步，酒神都會掌管其他酒類，好似燒酌等。不過佢亦透露，過往清酒並非其至愛，佢個人比較喜歡威士忌，對日本威士忌有收藏同研究，但依家開始會研究清酒更多。佢仲笑言拎咗榮譽唎酒師酒匠之後唔一定要豪飲，要識享受同細味先係重要。