政情：陳茂波預算案未出民望已暴瀉
現屆政府民望長期低迷，管治團隊嘅表現備受抨擊。最近「升呢」做財政司司長嘅陳茂波（波叔），早就被外界批評未夠班，仲要臨急上任負責寫財政預算案，預算案未出爐，佢嘅最新民望已見紅、直插谷底，對下嘅就係劣迹斑斑嘅教育局局長吳克儉（吳得掂）墊底，咁嘅形勢唔理係好彩定唔好彩，總之係反映市民對波叔冇乜信心喇！
張建宗「升呢」亦無起色
以波叔為例，佢在任發展局局長已經頻頻甩轆，搵唔夠地建屋之餘，又爆出劏房同囤地風波，民望長期低迷。即使佢最近接任財政司司長，但根據港大民意研究計劃在二月六至九日進行的民調，成功訪問咗逾千名市民，結果顯示波叔嘅最新評分低見三十四分，支持率淨值為負百分之二十九，喺成個管治團隊中排名尾二，民望之低「直逼」長期墊底、支持率淨值負百分之四十八嘅吳得掂。至於同樣新上任嘅政務司司長張建宗，之前在任勞工及福利局局長時民望一直無起色，就算升呢後最新評分亦只有五十點四分，支持率淨值亦只有百分之十二。
財政司司長責任重大，加上就快要公布財政預算案，唔少人都質疑波叔唔夠班接手；而喺庫房水浸下，公眾有好大期望，希望政府能夠還富於民，令到小市民生活得好啲，但係佢喺最新嘅網誌所提到醫療、教育開支增幅等繼續係老調重彈，睇唔到有乜新動作，難怪佢未交功課，市民已經對佢無晒信心。
馬紹祥蕭偉強無人識
另外，喺近日「坐正」嘅發展局局長馬紹祥，上年曾經因為喺立法會被社民連議員梁國雄搶走文件而報警，又被揭曾經在一間被揭違規挪用政府機密資料嘅公司工作而引嚟處事不公嘅質疑，發生過啲咁爭議性嘅事件，應該外界對佢有好深印象（口架），但民調結果顯示其支持率淨值只有百分之一；同樣坐正嘅勞工及福利局局長蕭偉強亦只係保得住正數。不過，佢哋嘅支持率同反對率平均只得十幾個百分點，反映佢哋知名度不足，落區啲街坊都未必認到佢哋。