中環出更：鄧達智搞盆菜宴 賓客落雨照撐

過年食盆菜要數最有氣氛嘅一定係喺屏山鄧氏祠堂，著名時裝設計師鄧達智（William）今年一如以往喺屏山舉辦盆菜宴，吸引一班城中名人遠道而來品嘗，卓妮見主人家William忙住滿場飛招呼賓客，但臨開始前突然落雨，但仍無損到場好友意興，擔住遮一樣照撐場，好在落咗一陣雨勢就轉弱，部分露天嘅枱亦搬到隔鄰有蓋位置開餐。
楊素珊（右）同陳竹君（左）每年都會入屏山捧老友鄧達智（中）場。（溫國佳攝）
楊素珊（右）同陳竹君（左）每年都會入屏山捧老友鄧達智（中）場。（溫國佳攝）

見William身形消瘦咗好多，佢話因為早前十月牙痛發炎，醫生稱有搶水情況，所以佢就戒晒雪糕等甜食同澱粉質，之後雖然剝咗隻牙，但就習慣咗唔食甜嘢澱粉質，唔覺唔覺竟然瘦咗十一公斤，連身邊朋友都忍唔住捉佢去驗身，連血都驗埋，好彩梗係咩事都冇喇！而講到盆菜佢最鍾意嘅係黃酒雞，啱晒今年雞年食噃！

甘琨禮話淺嘗無損健康

來自燒鵝世家嘅甘琨禮就話識咗William好多年，亦嚟屏山食過好多次盆菜，但媽媽同太太則係第一次啫！佢覺得呢度盆菜夠晒傳統，出面未必食到，而盆菜係中國傳統文化，雖然有人話唔健康，但淺嘗就冇問題，呢日佢見好多外國人都慕名而來，身為中國人嘅就更加要珍惜同保存呢個習俗。

食盆菜最緊要係氣氛，每年都嚟捧場嘅專資會理事楊素珊同本地藝術家陳竹君，除咗一齊着上紅色衫現身，又喺食飯時同醒獅合照，企晒起身欣賞，非常投入。香港檢測和認證局主席于常海就帶埋好友廠商會常董盧毓琳與太太及僑豐行行政總裁黃偉鴻夫婦一齊嚟食，于常海仲笑指心理都會影響健康，所以間唔中要畀自己食啲想食嘅嘢，咁先會開心，肥豬肉一樣照食喎。

甘琨禮（左起）帶埋八十多歲嘅媽媽及太太嚟，覺得食盆菜最緊要氣氛。
  • 甘琨禮（左起）帶埋八十多歲嘅媽媽及太太嚟，覺得食盆菜最緊要氣氛。
于常海（後）同好友盧毓琳夫婦（右一及右二）及黃偉鴻夫婦（左一及左二）一齊嚟食盆菜。
  • 于常海（後）同好友盧毓琳夫婦（右一及右二）及黃偉鴻夫婦（左一及左二）一齊嚟食盆菜。
當日盆菜正式開始之前落咗一陣微雨，涼涼哋更有氣氛。
  • 當日盆菜正式開始之前落咗一陣微雨，涼涼哋更有氣氛。

卓妮

第一手消息請下載on.cc東網iPhone/iPad/Android/Windows Phone Apps