政情：臨別憶舊時 陳婉嫻似「游BB」
青年新政游蕙禎以一身文青look，被網民捧為「游BB」或「女神」，但文青look始祖，可能係廿多年前嘅工聯會立法會議員陳婉嫻。嫻姐早於九十年代嘅單張已有類似打扮，唔知佢哋兩個年代嘅文青有冇機會世紀合照呢？
嫻姐事先張揚不會競逐連任立法會，告別議會在即，佢都開始搵番啲舊宣傳單張懷舊一番，只見嫻姐由最早嘅九一年，到○八年幫黃國健「抬轎」出戰嘅單張，全部都收藏得井然有序。適逢游蕙禎最近頻頻以一身時尚文青look現身，嫻姐引述有同事話，其實佢都有文青look，搵番舊單張都有類似打扮嘅照片。
嫻姐又派發最新工作報告，喺結語部分佢自言於數十年服務生涯，唯一唔熟悉「言退」兩個字，似乎講到「退」呢個字，政治人物都別有一番感受。難怪有啲議員做極都唔退喇。