政情：泛民拉布累陳健波屙唔停
立法會尋日恢復二讀《二○一六年醫生註冊（修訂）條例草案》，表明反對條例嘅議員展開拉布戰，全日共十五次點算開會法定人數。受拉布所累，保險界議員陳健波即使身體抱恙，屙咗最少七至八次，臉青口唇白，但一直未能就醫。期間有「塘邊鶴」就玩嘢建議，立法會示威區有好多醫生集會，不如落去打支針，止屙再算。不過，立法會到傍晚流會收場，相信陳健波大把時間睇醫生喇！
怕流會 冇時間睇醫生
立法會尋日十五次點算法定人數，每次點人數議員就需要返回會議廳，但我哋發現陳健波行返會議廳時腳步浮浮，搖搖擺擺，更險仆低。當時陳健波話，佢已經屙咗七至八次，但應承咗食物及衞生局局長高永文會留到晚上八時，以免流會，所以暫時唔會睇醫生，佢又擔心醫學界議員梁家騮返到立法會後，會搵佢討論草案，所以都係等到完會先算喇。
對於有人建議佢落去示威區搵醫生打支針，波哥就話最怕打針，之後就急急腳走人。其實啲醫生去示威點會帶埋啲針喺身吖，啲人真係噏得就噏。