中環出更：金刀梁追女仔靠史諾比做媒人
唔少情侶相識都總要有個契機，估唔到標準工時委員會主席梁智鴻（金刀梁），同太太放射科醫生梁馮令儀嘅紅娘係史努比！卓妮早前在一個活動上見到梁太，佢話當年金刀梁教佢好嚴謹，當時剛剛開始有史諾比等卡通片睇，兩人都好鍾意，仲成日談論卡通片添，慢慢就變得相熟嘞！佢仲大讚丈夫「識做」，係「愛妻號一號」。
梁太話，佢兩公婆都冇乜嗜好，淨係鍾意工作，可能係因為二人將興趣變成工作啦！二人咁夾，至今亦好恩愛，凌晨一、兩點，梁太仲會等埋金刀梁放工，一齊喺屋企食消夜撐枱腳，雖然二人都係醫生，但梁太笑指食嘅嘢「絕對唔健康」，因為金刀梁鍾意食煎蛋、午餐肉、叮叮飯等，但佢哋每日都會行好多路，做吓運動嘅。
朱鼎耀熱氣球浪漫求婚
卓妮轉頭又見到觀瀾湖集團副主席朱鼎耀，佢回憶十二年前追求太太時，為咗工作，二人經常出外公幹，好難先有機會見面，佢會寄信給太太維繫感情，終於有一次，二人相約喺倫敦見面，太太才答應佢追求。拍拖多個月後，有次二人喺美國，朱鼎耀凌晨四點鐘帶佢去坐熱氣球，仲喺上面求婚，太太喺未清醒嘅情況下答應咗喇。
同場仲有南旋集團主席王庭聰，佢話同太太以前係毛衫廠嘅同事，但佢相當怕醜，就算係同事，都要靠太太啲姊妹介紹，佢當年二十歲，二十三歲就娶咗太太，大讚香港女仔「用心就好易追」喎。不過，呢個年代好現實，除咗用心之外，相信仲要有樓有錢先至掂喇。
卓妮