話說戰國時代名醫扁鵲有次遇到一個內臟腐壞、奄奄一息嘅病人，於是做好心幫佢移植狼心同狗肺，點知對方醒番後倒打一耙，反誣扁鵲偷錢，仲告將官去，好彩縣令明察秋毫，至冇冤枉好人，呢個亦係成語「狼心狗肺」嘅出處。
冇錯嘞，講緊嘅之唔係南亞兵團囉。係人都知，港府對假難民關照有加，包食包住不特止，仲出埋錢畀佢哋打官司，可惜吖，港府仁至義盡，弊在有啲人恩將仇報，姦淫擄掠，無法無天，搞到香港陸沉咁滯。法庭尋日處理一宗風化案，有南亞籍男子喺庭上承認喺東涌非禮兩名男青年，據講除錫面及摸下體外，更採取進一步猥褻行為，都咪話唔得人驚！
講開狼心狗肺，恩將仇報，除咗南亞兵團之外，撐佢哋嘅團體都唔好得幾多。東方報業集團為民喉舌，持續踢爆南亞兵團禍港真相，有團體竟然發起所謂「撐難民大遊行」，呼籲「停止種族分化」又焚燒《東方日報》洩憤；亦有人批評功夫茶性別歧視。講真，如果聲請人士係真難民，香港人不吝伸出援手，但家陣酷刑聲請個案九成九係假嘅，來港避債有之，生仔有之，打黑工有之，作奸犯科有之，點幫得落呀？如果連假難民都撐，咁同撐人蛇集團、撐黑社會、撐刑事犯罪有咩分別吖。
至於話性別歧視咯喎，更加係天大笑話。冇錯，功夫茶係提醒過遊行女搞手出夜街要小心啲，但咁做係完全出於一番好意，好簡單啫，家陣假難民為禍，香港治安不靖，儼然淪為罪惡城，如果唔係，元朗等重災區嘅居民就唔會倡議組織自衞隊甚至「更練團」自保喇。針唔拮到肉唔知痛，換轉受害嘅係搞手或者佢哋嘅家人，相信佢哋就唔會咁輕鬆講風涼說話嘅嘞。
如果硬係要話功夫茶有咩錯，可能係唔記得提醒埋男搞手出夜街都要小心啲，事關南亞兵團「大愛包容」男女通殺，稍一不慎容乜易慘遭狼吻（口架）。再講吖，今時今日酒吧搞Ladies Night都畀人話性別歧視，溫馨提示都係一視同仁穩陣啲！
話時話，東方報業集團堅持發揮第四權監察功能，受打壓針對唔係一朝一夕嘅事。回歸前港英政府羅織罪名，回歸後港府部門更加輪番上陣，充當政治打手，家陣再有所謂人權組織出嚟單單打打，仲將幾個無知之徒推上前線，又有咩出奇吖！
不過大家可以放心，正所謂鐵肩擔道義，妙手著文章，我哋今後一定會繼續揭露社會陰暗面，絕唔會向惡勢力低頭，怕只怕有人病入膏肓仲一味諱疾忌醫，就算扁鵲再世都係嘥氣嘅咋！