政情：傳俞官興接任監警會秘書長
監警會早前鬧出秘書長朱敏健「被離職」風波，據聞監警會今次有別於以往公開招聘秘書長嘅做法，自行搵咗獵頭公司請人，終於有咗人選，有傳係今年年頭退休嘅海關副關長俞官興，佢坐鎮海關嗰陣，曾負責執行「限奶令」，風評唔錯。
但有口痕友話現年五十七歲嘅俞官興，退休時係副關長，屬於首長級官員薪級點D3，但監警會秘書長嘅職位只係D2，咁咪降Grade？但原來俞sir今次過檔監警會，合約為期三年，除咗月薪十五萬元，每月仲有三萬元津貼，另有百分之十五約滿酬金，計起上嚟，有多冇少，絕對唔算屈就。
據知，獵頭公司今次向紀律部隊嘅退休阿sir埋手，皆因佢哋有調查同執法經驗，但就冇考慮警隊退休高層嘞！梗係啦，警隊查番警隊，好易畀人話瓜田李下。聽聞俞sir年底會早少少上任準備交接。