政情：吸首投族 政團出動後生女
立法會換屆選舉於九月四日舉行，選民登記尋日截止報名，建制泛民連日發功爭取合資格年輕人登記成為選民，其中激進泛民政團如社民連、熱血公民等吸引首投族嘅策略類似，紛紛夥拍後生女拍攝短片並上載至互聯網，依家連爭取選民登記都各不相讓，政治路線類近嘅政團真係乜都鬥一餐。
外號「四眼哥哥」嘅鄭錦滿早前同鍾琬媛以網民創作嘅歌曲拍攝愛情音樂影片，呼籲市民登記成為選民，而影片中四眼哥哥仲要扮畀鍾琬媛摑一巴；另一邊廂，身穿校服嘅社民連副主席黃浩銘於短片中疑模仿經典檸檬茶廣告嘅橋段，偶遇心儀女士卻講不出口，最終女主角率先開口詢問黃有否登記做選民。
據黃浩銘透露，短片合共花咗五小時來拍攝及剪輯，而女主角非社民連成員，本身係社工。由此觀之，建制泛民陣營要吸引年輕人注意，認真要絞盡腦汁至得。