政情：學界爭勞工權益靠噏

九大專院校學生會「捉蟲」

泛民及建制勞工團體於每年五一勞動節表達訴求，已成為指定動作，亦反映該年勞工界最關注甚麼議題，但今年唔見大專學界嘅身影，而九間大專院校學生會，包括由孫曉嵐任會長嘅港大學生會、周竪峰任會長嘅中大學生會、科技大學學生會、浸會大學學生會等，以及曾派人參與立法會新界東補選嘅本土民主前線及主張港獨嘅香港民族黨，忽然發表名為「捍衞勞工、守護生活」嘅聯合聲明，回應缺席五一遊行一事。

九間大專院校學生會於聲明中表示，「傳統政黨組織聲稱捍衞工人利益，懇求港共政權憐憫改善港人處境，香港勞工權益卻至今毫無寸進」，當中標準工時老調重彈，最低工資、侍產假等修訂僅是「擠牙膏式」推出，佢哋表明「不甘於行禮如儀的表達訴求方式」，其後又提出多項訴求，包括取消強積金對沖機制，甚至廢除強積金、延長法定侍產假及設立標準工時等。

網民批少少尊重都做唔到

不過，有人形容九間大專院校學生會「捉蟲」，事關聲明中完全沒有交代有甚麼實質行動可以爭取以上訴求，此舉即時觸動大批網民神經，反批大專學界齋噏零行動，紛紛於多個大專學生會社交網站專頁留言反擊，其中有網民話，依家落實法定最低工資係前人爭取，「唔好話多謝都冇句，連嗰少少起碼尊重都做唔到」；另有多名網民更揶揄大專學界發表出聯合聲明，此舉真係「好勇武、好激進、好本土」。

聯工盟秘書長李卓人接受查詢時話，尊重學生及本土派意見，但強調「批評容易建設難」，大家應該參與爭取，而非隔岸觀火。周竪峰接受查詢時稱冇補充，似乎唔想講多錯多，旨在令呢個政治火頭慢慢降溫減弱。