中環出更：民記區議員甩轆 歡迎「索性」
民建聯（民記）嘅橫額同宣傳單張經常出錯屢見不鮮，繼上周有網民發現該黨嘅社區主任柯倩儀，竟然將「母親節快樂」翻譯為「Happy Father's Day」（父親節快樂）。該黨新紮屯門區議員葉文斌嘅宣傳單張亦錯漏百出，佢原本想宣傳其辦公室有免費報紙拎，點知將「歡迎索取」寫為「歡迎索性」，又將區內中學嘅校名寫簡寫，市民一唔小心就好容易去錯地方。
傳單錯漏百出
眼利嘅網民將傳單上嘅錯處圈起，最明顯嘅錯處係將索取寫做「索性」，其次係將其中一個派發點青松侯寶垣中學簡寫做青松中學，仲有將辦公寫錯做「辦工」，可謂犯齊晒低級錯誤。
葉文斌接受查詢時，最初仲否認寫錯校名，後來先改口話唔少街坊反映香港有多間青松中學，搞唔清楚究竟係邊間，跟住佢話會聽取大家意見，只係希望下次唔會將「侯寶垣」中學個名寫錯。佢又笑言，唔知小三TSA（全港性系統評估）試卷會唔會有Proofreading（校對）試題，如有可將此作為教材，但強調唔會怪責助理，因刊出前佢都睇過，可能係最近工作較忙而犯錯，承諾下次會小心。
卓妮