中環出更：浙江之友撐家鄉 特色米通饗市民
香港係個移民城市，大多數人都係唔同年代嘅「新移民」。旅港浙江籍人士早前喺維園首次舉辦浙江嘉年華，希望自己人飲水思源之餘，其他市民亦可多啲了解佢哋嘅故鄉。「手套大王」後人、香港浙江省同鄉會聯合會（浙聯會）會長詹耀良梗係有嚟坐鎮喇，而佢細佬、身兼浙聯會副會長嘅詹洪良、姪女詹嘉莉都忙到身水身汗，事關佢哋變身家鄉台州嘅宣傳大使，唔止落手落腳籌備展出內容，仲出動家族喺當地投資嘅酒店廚師炮製特色米通，空運到港與市民分甘同味。
詹洪良話台州旅遊資源好豐富，包括以懸崖峭壁聞名嘅大神仙居，仲有濟公活佛出生地天台縣等，好值得一遊。十幾年前佢已經開始帶本港大專學生返內地交流，其中每兩年就會到訪浙江。
帶港生遊神州 詹洪良唔覺攰
詹洪良笑稱，次次都親自帶隊，一啲都唔覺攰，同年輕人一齊仲感覺愈嚟愈年輕。後來佢索性成立「詹氏之友」聯繫團友情誼，至今已有近四百人。
當日仲見到唔少浙江名流去撐場，包括一代「船王」包玉剛女兒包陪慶、「新金王」李德麟等，同場仲有家族做入口米生意嘅香港食品委員會會長陳建年（Kenneth），佢係「米王」鉅發源米行創辦人陳漢華嘅孫，家族主要代理金鳳牌泰國香米。
唔知Kenneth今次入場係咪想搵其他生意做？但佢笑稱，做生意就唔會喇，今次係以商會身份嚟撐場。卓妮見佢對浙江出產嘅茶葉好熟悉，即場試飲十二年嘅陳年普洱後大讚甘香，仲落力幫手推銷雨前龍井添！
卓妮